هل السعاده فى الزواج؟؟ الجزء 1

طبعاً يعنى سؤال أهبل!!!!!
أنا عارفه بس معلش لازم نتكلم فى الموضوع ده
خدونى على قد عقلى
وتعالو نتفرج على نفسنا
يعنى البنت مننا أول ماتوصل ل 23 سنه تبدأ تحس أنها دخلت سباق مع الزمن
البت نشوى جارتى أتخطبت أمبارح البت جيهان كتب كتابها يوم الخميس الجاااى

البت سوسن البت سوسن المقرفه ديه اللى مناخيرها كبيرة اللى كانت معايا فى المدرسه أتجوزت يوم الخميس اللى فات
البت سلوى حامل فى شهرين
وتبدأ بقى تهرى وتنكت فى نفسها
ليه ولييييه العيال الهبله ديه تتجوز وانا لسه قاعده القاعده السودا ديه
وعلشان تلاقيلها مخرج من المصيبه ديه تبدأ بقى تتفحص وتتمحص كل شاب يمر أمامها
أبن خالتها أبن عمتها أبن خالت أبوها
أبن الجران
أهو أبن الحلال وخلاص
وبقى المكالمات الهاتفيه النسائيه تبتدى
مهى حرب بقى
أم شريف: الوووووو
أم مروة:أيوة مين معايا
أم شريف:أزيك يا ختى يا أم مروة عامله ايه
أم مروة: الحمد لله أنتى أزيك يختى وأزى شريف وسحر وممدوح
سحر ولدت ولا لسه
أم شريف: لا لسه الدكتور قال بقيلها 4 تيام كمان
أم مروة: ربنا يختى يقومها بالسلامه
أم شريف: أمين يا رب وأنتى أزيك يختى وازى عروستنا الحلوة
أم مروة:الحمد لله يختى شكلك كده جابالنا خبر حلو
أم شريف:حتة عريس ياأم مروة يختى أنما أيه عنده 35 سنه و مهندس فى شركه بترول وخدى عندك بقى المفجأه ديه أمه ميته
أم مروة:لالالالا متقوليليش دنتى يبقى ليكى الحلاوة لو الموضوع ده تم على خير
أم شريف: طيب أقولوا ييجى أمتى؟
أم مروة: بكرة على طوول ولا أقولك خليها بعد بكرة عشان ميقولش علينا مدلوقين
وتتم المقابله بدون الدخول فى التفاصيل البايخه أمثال الاستعداد وغيره
وطبعا العريس يطلع مكملش دبلوم صنايع وبيشتغل كهربائى فى شركه البترول ديه وشكله أستغفر الله العظيم
ومروة تاخد الكبسه اللى هيه كالعاده وترجع قفاها يأمر عيش

المهم يعنى والخلاصه فى القصص ديه نكد نكد نكد
النهارده عريس عدى الاربعين
بكرة عريس حياخد مروة ويسافر المجر ولا القطب الشمالى
وبعد بكرة عريس يتأمر علينا وعلى عيشتنا ويقول لا أصلها مش الاستايل اللى أنا عايزه
وبرضوا نكد نكد نكد
لحد ماترشق مع أدى العدى مروة وتتأهل
لولولولولولولولولولوى
مروة أتجوزت يا جدعاااااااااااااااان

يا ترى بقى مروة كده حتكون سعيده
أنها أتخلصت من شبح العنوسه اللى كان بيطلعلها كل يوم فى الضلمه ويخوفها
ويوريها شكلها فى المرايه وهيه شعرها أبيض ومنكوش ولسه أديها الشمال فاضيه مفيهاش دبله
ولا تقوم مفزوعه من النوم كل يوم والتانى على أنها نايمه لوحدها فى السرير ومفيش ولا حتى ضل راجل نايم جمبها
على العموم تابعوا الجزء التانى من
هل السعاده فى الزواج؟part 2

السعاده فى المال؟؟

ياترى السعاده فى المال؟؟
الفلوس يعنى؟؟
طبعا الفلوس ديه مهمه جدا جدا جدااااااااااا
بس يا ترى لما الواحد ممنا يكون معاه فلوس كتيييييييييييييييييييير أوى
يقدر يكون سعيييييد؟؟
ومتتسرعوش فى الرد
مش أول ما تقروا السؤال تقولوا لأ على طول
فكروا شويه
يعنى الواحد مننا لما يكون معاه فلوس يجيب بيها عربيه تريحه من المواصلات وقرفها
ولا الرجاله وجنانها
وقله الادب
ويكون معاه فلوس ياخد بيها كورسات فى مكان محترم
ولا مدام بنقول معانا فلوس يبقى نبدأ من الاول بقى
يدخل مدرسه لغات خاصه ولا مدرسه أجنبيه من اللى بيدفعلها الاااااااف فى التيرم الواحد و اليونيفورم بتاعها
تى شيرت ملون بألوان تفرح
مش مريله صفرا زرايرها من ورا شكلها يجيب أكتئاب
ويطلع الواحد ممنا بريطن كذا لغة زى اللبلب
ويقدر ياخد الكورسات اللى بنقعد نستنى لما أى جهه تتعطف علينا وتعمل منحه بأسعار مخفضه عشان نقدر ناخدها
ونطلع كده مؤهلين فعلا لسوق العمل
نقدر نقدم فى أى مكان بقلب جاااااامد
والسى فى يرفع الراس فعلا
كل ده والله محتاج كومه فلوس قد كده
ونلبس كويس وناكل كويس ونشرب كويس
ولا لما تدفع كده بقشيش والناس تحترمك أوى أوى
كل مكان تطلع ورقه بخمسين جنيه أجدع عقده فى أى مصلحه حكوميه تتحل وتمشى زى السكينه فى الحلاوة على رأى الاستاذ اللمبى
الفلووووووووووووووووووووووووووووووووووووووووووووووووس
أنا عارفه أنها مش هيه اللى حتجيب السعاده وألا مكنش حد غلب
بس هيه وسيله هاااااامه جدا جدا لتحقيق الاهداف
وبالتالى لخلق قسط ولو بسيط من السعاده
والنجاح فى الحياه

تالته ثانوى عام

طبعا الثانويه العامه ديه مرحله بل وخطوة هاااااامه فى تاريخ كل واحد مننا
ومش حقولكم أنا أتصدمت قد أيه فى تانيه ثانوى لما جبت 85%
كانت صدمه كبيييييييييرة أوىىىىىى
بس حعمل أيه أتنكدت كام شهر كده وبعدين أبتديت أتأقلم مع الواقع الاليم
سيبنا بقى من النكد ده ربنا لا يعودها أيام
خلينا فى موضوعنا السعااااااااااااااااااااااده
بعد ما خلصت تالته ثانوى حسيت أن فى هم كبييييييير بل طوبه كبيييييييييرة أتشالت من على صدرى
حسيت أنى أخدت أفراج بعد قرار أعتقال دام عامان
سافرت الساحل الشمالى بعد ما خلصت أمتحانات بأسبوع
وكان أسبوع عمرى
فى حياتى ما قديت أسبوع كده
كنت بخاف أنام عشان مضيعش ولا لحظه
كان معانا خالتى وزوجها وأولادها
بس أولادها دول أخواتى
كنت حاسه أنى طفله أه والله طفله عمرها 7 سنين بالكتير
كنت بجرى
بجرى كتييييييير أوى
وبلعب بالكورة
ومش شايله هم
دخلت السينيما لاول مرة فى حياتى
وطبعا مش ممكن أنسى كان فيلم أيه؟؟؟
كان فيلم شورت وفانله وكاب
كنت حاسه أن حصلى حدث عظيم
دخلت السينيما يا رجاااااااله
وووووووووووووووه
مش ممكن
كان قلبى بيرفرف من الفرحه وأنا بتفرج على أحمد السقا والاخت نور
ياسلاااااااااااااااااااااام
ورجعت من السينيما قعدت على البحر بالليل وده كان حلم من أحلامى
وكلت غزل البنات أكلتى المفضله
وروحنا قعدنا نلعب الشايب أنا وأختى وجيراننا وولاد خالتى
وضحكت أوى من قلبى
حسيييييييت بالسعاااااااااااااااااااااااده
بجد بجد
أحساس مش ممكن أقدر أوصفه
اسبوع كده ولا فى الاحلام
وديه كانت أخر مرة أحس فيها بالسعاده الحقيقيه
أه والله
السعاده اللى هيه السعاده
مش السعاده ككلمه لأ
السعاده اللى بتخلى القلب يرفرف من الفرحه
ومنذ هذا الاسبوع الى يومنا هذا
بتمنى يوم وااااااااااااااااحد من الايام ديه
طيب بلاش يوم يوم كتييير
سااعه واحده بس من الاسبوع ده
الواحد مكنش شايل هم لحاجه
لاشغل ولا جواز ولا نكد ولا عرسان ولا هم ولا فراغ ولا حسرة ولا خيبه الامل اللى شايله جمل

أول مرة حسيت بطعم السعاده بجد

فاكرة اليوم من اوله
فاكراه زى ما يكون فيلم
صحيت روقت الشقه مع تيته وأختى
وبعدين واحده صحبتى أتصلت بيا فى التليفون قالتلى: الحقى النتيجه بتاعتنا ظهرت أنزلى بسرعه
سيبت السماعه من أيدى وجريت على أختى وتيته كانوا بيشربوا شاى بلبن وقاعدين على طربيزة السفرة
قولتلهم النتيجه ظهرت أعمل ايه لازم أنزل
أختى قالتلى :أنا حاجى معاكى وفجأه جرس الباب رن روحت فتحت لاقيت جارتى أصغر منى بسنه بتقولى تيته بتقولك أ...
قوتلها النتيجه ظهرت معلش لازم أنزل
ودخلت قضتى وقفلت الباب ولبست أى حاجه اللى كان قدامى
وفتحت الباب لقيت أختى وجارتى لابسين ومستنيننى
قالولى: جايين معاكى مش ممكن نسيبك لوحدك
وجريت بسرعه على المدرسه أصلها جنب البيت
وأول ما وصلت لاقيت مستر/ طه مدرس الرياضه بيزيع النتيجه فى الميكريفون
وقعدت أسمع الاقى كل النتايج زى الزفت
كل الناس 210 ,220 أخرهم كده 230
وأصحابى اللى بتعيط واللى بتصوت
وفجأه لاقيت أسمى بيتنده
أتسمرت وزى ماأكون مش سامعه ولا شايفه
وفجأه الاقى مستر طه بيقول الطالبه ......................... درجه255
لولولولولولولولولولولولولولولولولولولولولولولولولولولولولولى
أنا أجيب 255
العيال أصحابى زى مايكونوا أتحنطوالاقيت الناس سكتت وأتجهت الانظار الى العبده لله
يا لهوىىىىىىىىىىى
قل أعوذ برب الفلق
الله أكبر
عينكوا ليكوا
أولياء الامور رجاله وستات بصولى حته بصه
وبقهم اتعوج لحد ودنهم وبصوا لولادهم
أنا بقى مشفتش قدامى
حسيييييييييييييييييييييييييييييييت بالسعااااااااااااااااااااااااااده
الله
طعمها حلو أوى أوى أوى
وجريت من قدامهم قولت بدل ما أولع وأنا واقفه
جريت وأختى وجارتى بيجروا ورايا
مبرووووووووووك يا .....
مبروووووووووووك....
مشينا متجهين للبيت
وأنا حاسه والله أنى مش ماشيه على رجلى
حاسه أنى طااااااااااايرة
أه والله
حاسه أنى طايرة
وعماله ألًف حولين نفسى وأنا بضحك ضحكه هستيريه


وديه كانت أخر مرة أحس فيها بالسعاده أوى كده
الفولت كان عااااااااااالى أوى أوى عليًا
أكتر مرة حسيت بطعم السعاده أوى أوى
وديه يا أصحابى كانت فى الاعداديه
كان عندى تقريبا 14 سنه
يا لهوىىىىىىىىىىىى
10 سنين
ومحستش لحد دلوقتى بألاحساس ده تانى خااااااااالص
بس يااااااااااارب مفيش حاجه بعيد على ربنا

باحثه عن السعاده

باحثه عن السعاده فى مجتمع تعيس
أبحث وأبحث ولم أجد شيئا
طيب أروح أبحث فى مكان منور شويه
برضو مش لاقياها
السعااااااااااااااااااااااااده؟؟؟؟!!!!
الاقيها فين بس ؟؟
لو بتتباع يا ناااااس حد يقوللى أجيبها منين؟؟؟
طيب هيه طعمها أيه؟؟
حد داقها؟؟
طعمها حلو؟؟
معرفش أنا؟؟
وحعرفها منين
طبعا الحمد لله الف حمد والف شكر ليك يا رب على النعم اللى أدتهانى
الحمد لله بجد نعم لا تعد ولا تحصى
بس يا ترى السعاده ليها علاقه بالرضا
أه طبعا أكيد ايه السؤال السازج ده
بس أنا نفسى أكون سعيده
نفسىىىىىىىىىىىىىى
تيجوا تدور مع بعض عنها
وأزاى نلاقيها
مهو أنا مش حفضل طول العمر أدرو لوحدى حرام كده